每個見習督察，都會好記得自己摸嘅第一條魚，稚嫩中帶點不適應，但又要鼓起勇氣，扮唔驚

「有單Person Collapse吖，位置係……」

左邊膊頭掛住嘅CC4傳出電台台長把聲，喺凌晨四點幾顯得特別刺耳。

呢位台長出名旺，心火旺，波路都旺，拍佢，其實心入面已經做好心理準備。

我係一位見習督察，俗稱「朱粒」，今日係我返嘅第一個夜尾，現在時間0419 hrs，我相當可能迎來我人生中第一次嘅check body。

幫人地嗰種。

呢個時候，一定有師兄會嘈：「喂，Person Collapse咋喎，你唔好咁黑心覺得人地一定有事啦，普通暈咗唔得嘅」

Wait one, bro。

附近有間老人院，通常四點開始巡房派藥喂早餐，如果發現有婆婆伯伯暈咗，就報警，所以呢個鐘數嘅Person Collapse，十居其九係要做到最後的。

點解我知？

雞咩一早教曬我。雞咩本人陽氣好足，好似雄雞咁，而且真名發音同「雞」字相似，所以俾咗啊咩（警署警長）之後大家都叫佢「雞咩」。

雞咩係我出黎第一個師傅，雖然佢警階上低過我，我係見習督察，佢係警署警長，不過如果你喺Force耐咗你就明白，啊咩如果肯教你嘢，執到啦。

雞咩好錫我，直頭當仔咁教，我同佢有好多故事，有機會再寫出黎。

「紅白車到場，無呼吸，無脈搏，So far…」

台長把聲繼續喺CC4傳出黎，Office入面一時之間無人講嘢，非常安靜，得返部發霉嘅中央冷氣一直吹氣出黎嘅聲，有啲似人走前最後呼出黎嗰幾啖氣。

虛弱，斷斷續續。

「婆婆依家送去XXX醫院，詳情後上…」

依舊係台長把聲，feel到台長今次語氣凝重咗少少。

無事嘅，我喺內心安慰自己。

我知道遲早有呢一日，PSUC（軍裝巡邏小隊指揮官）其中一個最重要嘅職責就係當有死亡事件發生時，初步判斷有無可疑成分，所以要為屍體進行檢查，並將所有詳情記錄喺本粉紅色Notebook（警察記事冊）。

有時候老人院虐老事件都係喺呢個check body嘅過程中揭發的。如果其後死因庭覺得有嫌疑，會安排詳細解剖，並要求案件主管作證，所有PSUC喺呢一步都極度仔細認真，不能出錯。

「Gigi，我去裝炷香先，陣間返」我講完就離開咗Office。

Gigi係我admin，就黎四十歲，人非常精神，除咗英文爭啲，無乜缺點，交代嘅task都可以好好地完成，不過個人唔搏，我喺幾個月之後逼咗佢tick上格床（申請晉升），呢個後話，有機會再講。

Alright，三神兩鬼，先中後側…

我按照雞咩教嘅流程，抽出三支清香，慢慢點著，左手夾住香，右手虛掩左手，恭恭敬敬咁上咗三支清香俾關聖帝君。

「婆婆Certified，時間0444 hrs…」台長把聲今次好清晰，應該差唔多天光所以佢生理時鐘都醒咗。

我裝香嘅雙手就尷尬地繼續懸在半空。

啱啱裝完香就certified，我抬頭望一望關二哥，呢個角度咁啱關二哥又望住我。

Fine（-`д´-）。

「雞咩，準備車，大地等」

未完待續……

原作聲明

本專欄《朱粒日誌》所載內容僅供娛樂及創作交流之用。

虛構創作：故事中之人物、姓名、角色及情節均屬虛構。內容雖參考業界日常，但已因應敘事需要經過大幅度微調及戲劇化處理。如有雷同，實屬巧合。

立場聲明：本帳號之言論及內容純屬作者個人創作，並不代表香港警務處或任何官方機構之立場。

非法律建議：內容提及之程序或規例僅為劇情推動之用，並不構成任何專業法律意見或程序指引。

原貼文影像說明：輪播內的圖片由 AI 繪圖技術生成，並非真實照片，亦不涉及任何真實案件之現場記錄。本網頁為文字整理版。