「雞咩，準備車，大地等」

我一邊急步行落幾層去停車場，一邊用CC4同雞咩落order，我要去醫院check body。

Right at the moment我打開地下嗰層大門，我就見到雞咩企喺架衝鋒車隔離，打開咗副駕駛門等我出發。

「Sir，其他車做緊嘢，好彩仲有部IVECO」

雞咩一如既往地淡定，仲有種文質彬彬嘅感覺。

「Sir，口罩ready」

Gigi拉開車廂趟門，揚咗幾下手上口罩，仲係獨立包裝添。

醒目啊Gigi，效率世一。

「上車，去XXX醫院」

我一下跳上車，扣上安全帶，落完order就整理思緒，陣間唔可以有遺漏。

倒後鏡入面嘅警署越黎越細，直到一個轉角，徹底消失唔見。

凌晨馬路上無咩車，我地好快就到咗。一行幾人魚貫而入，急症室都仲係好多人，一張張病人床排曬喺急症室大堂，隱約聽到陣陣痛苦嘅呻吟聲。

急症室實在太多人，病人又辛苦，姑娘都辛苦。

經過醫院警崗，順手問入面大佬拎咗幾個橡膠手套，一人一對。

我個人習慣將左手手套末端拉長啲遮埋Apple Watch，等佢唔好捐嚟捐去，再將口罩上方鐵線壓緊貼服鼻樑。

一切ready，入得房。

入到去，我終於第一次近距離見到一個body。

當心臟停止跳動，全身血液開始凝固，body全身嘅皮膚都會顯得蒼白一片。除此之外，下顎亦會因為重力原因向下拉扯，而嘴巴張開。

義大利畫家Annibale Carracci喺1603年畫過一幅油彩畫—The Dead Christ Mourned，中文翻譯係聖母哀悼基督之死，有興趣可以去問下Gemini，同我眼前見到嘅畫面相當貼近。

「Sir，陣間家屬會入黎望多次，我地如果可以，最好做多一步，幫忙整理下儀容…」

雞咩一邊輕輕將婆婆嘅下巴托返好，令嘴巴可以合埋，同時將眼睛微微合上，又將頭髮略為整理。老實講，經過雞咩一番仔細嘅梳理，婆婆睇落只係訓著咗，唔似已經離開，如果我係婆婆，有人喺我離開後咁樣幫我扮返靚靚，見屋企人最後一面，我會衷心多謝佢。

Supposed呢個係我職責，但雞咩話第一次示範俾我睇，之後就要靠我自己。雞咩真係好好，可以話無佢，我唔會成長得咁快。

但當然，我唔會翹埋雙手喺隔離叉腰睇錶，呢個係我職責，於是我跟住雞咩一步步仔細檢查，佢做乜我跟住做乜，確保無可疑成分。

婆婆全身檢查過後一切正常，無可疑成分。

但睇得多電影就知道，不出意外的話，意外就要出現了。

「Sir，婆婆隻手捉得好實，戒指掹唔到落嚟…」

其中一個輔警同事突然出聲，講完我背脊突然毛咗一下。

死者身上財物通常我地會幫手收集，按照既定程序俾返死者家屬，所有財物都會記錄喺Notebook度，一黎避免喺運送過程中遺失，二黎如果有需要的話，方便後續解剖工作，三黎呢啲財物好有可能係死者家屬嘅一個念想，儘快俾返家屬，至少可以睹物思人。我地如果可以做多步幫忙的話，我地都會盡做。

不過如果你話隻手捉得好實…

Damn，第一次就咁高難度？

未完待續…

原作聲明

本專欄《朱粒日誌》所載內容僅供娛樂及創作交流之用。

虛構創作：故事中之人物、姓名、角色及情節均屬虛構。內容雖參考業界日常，但已因應敘事需要經過大幅度微調及戲劇化處理。如有雷同，實屬巧合。

立場聲明：本帳號之言論及內容純屬作者個人創作，並不代表香港警務處或任何官方機構之立場。

非法律建議：內容提及之程序或規例僅為劇情推動之用，並不構成任何專業法律意見或程序指引。

原貼文影像說明：輪播內的圖片由 AI 繪圖技術生成，並非真實照片，亦不涉及任何真實案件之現場記錄。本網頁為文字整理版。