我望住雞咩，雞咩又望住我。
唔知係咪錯覺，周圍溫度好似低咗幾度。
「Sir，通常黎講Rigor Mortis（屍僵）無咁快的，尤其是婆婆剛剛cert無耐，唔應該有呢個情況，不過唔洗擔心」
雞咩停咗一停，喺strong belt pouch入面拎咗包紙巾出黎。
「Sir，有啲嘢入面無教，但係出面行，你要學識」
我企喺隔離，表面鎮定，其實內心好緊張。
「婆婆，」
雞咩突然開口，唔係同我講嘢，係同婆婆講。雞咩把聲好柔，好似平時打電話俾佢個女嗰把聲。
「我係警察，呢位係我長官，我哋今日嚟係幫你執拾好，等陣你啲仔女就嚟睇你。你隻手放鬆啲，戒指我哋幫你收好，等陣交返俾你屋企人，好無？」
話音一落，雞咩隻手輕輕包住婆婆隻手，無用力硬扯，只係用佢帶住藍色膠手套嘅大隻手，暖暖咁揉咗婆婆手背幾下。
奇跡就喺呢一刻發生。
我發誓，我真係見到婆婆隻手由原本「硬過鋼筋」嘅狀態，慢慢鬆開咗。雞咩趁呢個機會，動作極其俐落咁將嗰隻金戒指褪咗出嚟。
「得喇，Sir，搞掂。」雞咩轉過頭望住我，眼神平淡，「通常係咁，有啲老人家走嗰陣有心事，或者係唔捨得，佢哋會『留』住一啲嘢。你同佢傾兩句，俾個承諾佢，佢就放手㗎喇。」
Nani！？Σ(°ロ°)!
我呆咗喺原地。好科學地去解釋，我可以話係肌肉神經殘餘反應，但係眼前呢種情況，學堂真係無教過…
「Sir，家屬到咗。」Gigi輕聲提醒我。
「收到。」
我隨即同雞咩出返去準備同婆婆家屬交代事後嘅一啲程序，呢一幕我已經喺腦海入面預演過好多次，我相信我可以好專業地按住死者家屬嘅情緒，令佢哋節哀順變，唔會太傷心嘅。
出去後，我見到婆婆屋企人明顯情緒激動，尤其是婆婆個女，眼已經又紅又腫。
當婆婆女兒見到我地裝好嘅金戒指時，情緒崩潰，突然放聲大喊出黎。
「我以後無媽咪喇。」
未完待續…
原作聲明
本專欄《朱粒日誌》所載內容僅供娛樂及創作交流之用。
虛構創作：故事中之人物、姓名、角色及情節均屬虛構。內容雖參考業界日常，但已因應敘事需要經過大幅度微調及戲劇化處理。如有雷同，實屬巧合。
立場聲明：本帳號之言論及內容純屬作者個人創作，並不代表香港警務處或任何官方機構之立場。
非法律建議：內容提及之程序或規例僅為劇情推動之用，並不構成任何專業法律意見或程序指引。
原貼文影像說明：輪播內的圖片由 AI 繪圖技術生成，並非真實照片，亦不涉及任何真實案件之現場記錄。本網頁為文字整理版。